പത്തനംതിട്ട : ശബരിമല നട ഇന്നു തുറക്കും. ചിങ്ങ മാസ നിറപുത്തരി പൂജകള്‍ക്കായിട്ടാണ് ക്ഷേത്രനട തുറക്കുന്നത്. ഇന്ന് വൈകിട്ട് 5 മണിക്ക് ചടങ്ങുകള്‍ ആരംഭിക്കും. നാളെ പുലര്‍ച്ചെ 5.55 നും 6.20 നും മധ്യേയുള്ള മുഹൂര്‍ത്തത്തിലാണ് നിറപുത്തരി പൂജ. നാളെ മുതല്‍ 23 വരെ ഭക്തരെ ദര്‍ശനത്തിനായി കടത്തിവിടും. ഓണ്‍ലൈനായി ബുക്ക് ചെയ്ത 15,000 പേര്‍ക്കാണ് ദിവസേന പ്രവേശനം അനുവദിച്ചിരിക്കുന്നത്.

ക്ഷേത്ര തന്ത്രി കണ്ഠരര് മഹേഷ് മോഹനരുടെ മുഖ്യകാര്‍മ്മികത്വത്തിലാണ് നട തുറക്കുക. മേല്‍ശാന്തി വി.കെ.ജയരാജ് പോറ്റി നട തുറന്ന് ദീപങ്ങള്‍ തെളിക്കും. തീര്‍ത്ഥാടകര്‍ രണ്ട് ഡോസ് വാക്സിന്‍ സ്വീകരിച്ച സര്‍ട്ടിഫിക്കറ്റോ അല്ലെങ്കില്‍ 48 മണിക്കൂറിനുള്ളിലെടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റോ കൈയില്‍ കരുതിയാല്‍ മാത്രമേ പ്രവേശനം ലഭിക്കൂ.